वाटपग्राहींचे अधिकार व कर्तव्ये | महाराष्ट्र स्थावर संपदा नियामक प्राधिकरण

अधिनियमाच्या कलम १९ नुसार वाटपग्राहींचे अधिकार खालील प्रमाणे आहेत.

अधिनियम किंवा त्यांतर्गत तयार केलेल्या नियम व विनियम किंवा प्रवर्तकाच्या सोबत स्वाक्षरीत केलेल्या विक्री करारातील सक्षम प्राधिकरणाकडून मान्यता प्राप्त झालेले आराखडे, विनिर्दिष्टांसह अभिन्यास आराखडे व अन्य माहिती जाणून घेण्याचा वाटपग्राहींना अधिकार असेल.
प्रवर्तक व वाटपग्राही यांच्यातील निष्पादित विक्री करारातील अटी व शर्तीनुसार सहमती असलेल्या पाणी, स्वच्छता, वीज व इतर सुविधांसह प्रकल्प पूर्ण होण्यासाठी टप्पे निहाय वेळापत्रक जाणून घेण्याचा वाटपग्राहींना अधिकार असेल.
कलम 4 मधील उपकलम 2 मधील परिच्छेद 1 मधील उपपरिच्छेद क अन्वये प्रवर्तकाने सादर केलेल्या घोषणापत्रानुसार वाटपग्राहींना यथास्थिती सदनिका, भूखंड किंवा इमारतीचा व वाटपग्राहींच्या संस्थेला सामाईक क्षेत्राचा ताबा दावित करण्याचा अधिकार असेल.
प्रवर्तक म्हणून व्यवसाय बंद केल्यामुळे किंवा अधिनियमातील अथवा त्या अंतर्गत तयार केलेल्या नियम अथवा विनियमानुसार नोंदणीचे निलंबन किंवा रद्दीकरण झाल्यामुळे विक्री करारातील अटी व शर्तीनुसार प्रवर्तक यथास्थिती सदनिका, भूखंड किंवा इमारतीचा ताबा देण्यास किंवा अनुपालन करण्यास असमर्थ ठरल्यास वाटपग्राही हे अधिनियमात विहित प्रक्रीयेनुसार नुकसानभरपाई व विहित दराने व्याजासह प्रदान केलेल्या रकमेचा परतावा दावित करण्यासाठी हक्कदार असतील.
प्रवर्तकाने यथास्थिती सदनिका, भूखंड किंवा इमारतीचा प्रत्यक्ष ताबा सोपविल्यावर सामाईक क्षेत्राशी संबंधित व अन्य आवश्यक ते सर्व दस्तऐवज व आराखडे प्राप्त करण्याचा अधिकार वाटपग्राहींना असेल.
यथास्थिती सदनिका, भूखंड किंवा इमारत घेण्यासाठी विक्री करार करणारा वाटपग्राही हा कलम १३ नुसार सदर विक्री करारात विहित कालमर्यादेत आवश्यक ती प्रदाने विहित पद्धतीने करण्यास जबाबदार असेल व त्याने नोंदणी शुल्क, महानगरपालिकेचे कर, पाणी व वीज शुल्क, देखभाल शुल्क, भूभाडे व अन्य शुल्कातील आपला वाटा योग्य वेळ व ठिकाणी प्रदान करेल.
उपकलम ( 6 ) नुसार देय रक्कम किंवा शुल्क प्रदान करण्यात विलंब झाल्यास वाटपग्राहीं विहित दराने व्याज भरण्यास उत्तरदायी असतील.
प्रवर्तक व सदर वाटपग्राही याची आपसात सहमती झाल्यास उपकलम ( 6 ) मधील वाटपग्राही यांची उत्तरदायित्वे व उपकलम ( ७ ) मधील व्याजाचे दायित्व कमी करता येऊ शकेल.
यथास्थिती प्रत्येक सदनिका, भूखंड किंवा इमारतीचा वाटपग्राही वाटपग्राहींची संघटना किंवा संस्था किंवा सहकारी संस्था किंवा त्यांचा महासंघ गठीत करण्यामध्ये सहभागी होईल.
यथास्थिती सदर सदनिका, भूखंड किंवा इमारतीचे भोगवटा प्रमाणपत्र जारी झाल्यावर दोन महिन्यांच्या आत वाटपग्राही यथास्थिती सदर सदनिका, भूखंड किंवा इमारतीचा ताबा घेईल.
अधिनियमाच्या कलम 17 मधील उपकलम ( 1 ) मधील तरतुदी नुसार यथास्थिती सदर सदनिका, भूखंड किंवा इमारतीच्या अभीहस्तांतरण विलेखाची नोंदणी करण्यासाठी प्रत्येक वाटपग्राही सहभागी होईल.